Part 1 · blocks 1–20
॥ श्रीकनकधारास्तोत्रम् ॥ अङ्गं हरेः पुलकभूषणमाश्रयन्ती भृङ्गाङ्गनेव मुकुलाभरणं तमालम् । अङ्गीकृताखिलविभूतिरपाङ्गलीला माङ्गल्यदाऽस्तु मम मङ्गलदेवतायाः ॥ १ ॥
|| śrīkanakadhārāstotram || aṅgaṃ hareḥ pulakabhūṣaṇamāśrayantī bhṛṅgāṅganeva mukulābharaṇaṃ tamālam | aṅgīkṛtākhilavibhūtirapāṅgalīlā māṅgalyadā'stu mama maṅgaladevatāyāḥ || 1 ||
मुग्धा मुहुर्विदधती वदने मुरारेः प्रेमत्रपाप्रणिहितानि गतागतानि । माला दृशोर्मधुकरीव महोत्पले या सा मे श्रियं दिशतु सागरसम्भवायाः ॥ २ ॥
mugdhā muhurvidadhatī vadane murāreḥ prematrapāpraṇihitāni gatāgatāni | mālā dṛśormadhukarīva mahotpale yā sā me śriyaṃ diśatu sāgarasambhavāyāḥ || 2 ||
आमीलिताक्षमधिगम्य मुदा मुकुन्दम्– आनन्दकन्दमनिमेषमनङ्गतन्त्रम्। आकेकरस्थितकनीनिकपक्ष्मनेत्रं भूत्यै भवेन्मम भुजङ्गशयाङ्गनायाः ॥ ३ ॥
āmīlitākṣamadhigamya mudā mukundam– ānandakandamanimeṣamanaṅgatantram| ākekarasthitakanīnikapakṣmanetraṃ bhūtyai bhavenmama bhujaṅgaśayāṅganāyāḥ || 3 ||
बाह्वन्तरे मधुजितः श्रितकौस्तुभे या हारावलीव हरिनीलमयी विभाति । कामप्रदा भगवतोऽपि कटाक्षमाला कल्याणमावहतु मे कमलालयायाः ॥ ४ ॥
bāhvantare madhujitaḥ śritakaustubhe yā hārāvalīva harinīlamayī vibhāti | kāmapradā bhagavato'pi kaṭākṣamālā kalyāṇamāvahatu me kamalālayāyāḥ || 4 ||
कालाम्बुदालिललितोरसि कैटाभारेर्– धाराधरे स्फुरति या तड़िदङ्गनेव । मातुः समस्तजगतां महनीयमूर्तिर्– भद्राणि मे दिशतु भार्गवनन्दनायाः ॥ ५ ॥
kālāmbudālilalitorasi kaiṭābhārer– dhārādhare sphurati yā taṛidaṅganeva | mātuḥ samastajagatāṃ mahanīyamūrtir– bhadrāṇi me diśatu bhārgavanandanāyāḥ || 5 ||
प्राप्तं पदं प्रथमतः खलु यत्प्रभावान्– माङ्गल्यभाजि मधुमाथिनि मन्मथेन । मय्यापतेत्तदिह मन्थरमीक्षणार्धं मन्दालसं च मकरालयकन्यकायाः ॥ ६ ॥
prāptaṃ padaṃ prathamataḥ khalu yatprabhāvān– māṅgalyabhāji madhumāthini manmathena | mayyāpatettadiha mantharamīkṣaṇārdhaṃ mandālasaṃ ca makarālayakanyakāyāḥ || 6 ||
विश्वामरेन्द्रपदविभ्रमदानदक्षम्– आनन्दहेतुरधिकं मुरविद्विषोऽपि । ईषन्निषीदतु मयि क्षणमीक्षणार्धम्– इन्दीवरोदरसहोदरमिन्दिरायाः ॥ ७ ॥
viśvāmarendrapadavibhramadānadakṣam– ānandaheturadhikaṃ muravidviṣo'pi | īṣanniṣīdatu mayi kṣaṇamīkṣaṇārdham– indīvarodarasahodaramindirāyāḥ || 7 ||
इष्टाविशिष्टमतयोऽपि यया दयार्द्र– दृष्ट्या त्रिविष्टपपदं सुलभं लभन्ते । दृष्टिः प्रहृष्टकमलोदरदीप्तिरिष्टां पुष्टिं कृषीष्ट मम पुष्करविष्टरायाः ॥ ८ ॥
iṣṭāviśiṣṭamatayo'pi yayā dayārdra– dṛṣṭyā triviṣṭapapadaṃ sulabhaṃ labhante | dṛṣṭiḥ prahṛṣṭakamalodaradīptiriṣṭāṃ puṣṭiṃ kṛṣīṣṭa mama puṣkaraviṣṭarāyāḥ || 8 ||
दद्याद्दयानुपवनो द्रविणाम्बुधाराम्– अस्मिन्नकिञ्चनविहङ्गशिशौ विषण्णे । दुष्कर्मधर्ममपनीय चिराय दूरं नारायणप्रणयिनीनयनाम्बुवाहः ॥ ९ ॥
dadyāddayānupavano draviṇāmbudhārām– asminnakiñcanavihaṅgaśiśau viṣaṇṇe | duṣkarmadharmamapanīya cirāya dūraṃ nārāyaṇapraṇayinīnayanāmbuvāhaḥ || 9 ||
गीर्देवतेति गरुड़ध्वजसुन्दरीति शाकम्भरीति शशिशेखरवल्लभेति । सृष्टिस्थितिप्रलयकेलिषु संस्थितायै तस्यै नमस्त्रिभुवनैकगुरोस्तरुण्यै ॥ १० ॥
gīrdevateti garuṛadhvajasundarīti śākambharīti śaśiśekharavallabheti | sṛṣṭisthitipralayakeliṣu saṃsthitāyai tasyai namastribhuvanaikagurostaruṇyai || 10 ||
श्रुत्यै नमोऽस्तु शुभकर्मफलप्रसूत्यै रत्यै नमोऽस्तु रमणीयगुणार्णवायै । शक्त्यै नमोऽस्तु शतपत्रनिकेतनायै पुष्ट्यै नमोऽस्तु पुरुषोत्तमवल्लभायै ॥ ११ ॥
śrutyai namo'stu śubhakarmaphalaprasūtyai ratyai namo'stu ramaṇīyaguṇārṇavāyai | śaktyai namo'stu śatapatraniketanāyai puṣṭyai namo'stu puruṣottamavallabhāyai || 11 ||
नमोऽस्तु नालीकनिभाननायै नमोऽस्तु दुग्धोदधिजन्मभूत्यै । नमोऽस्तु सोमामृतसोदरायै नमोऽस्तु नारायणवल्लभायै ॥ १२ ॥
namo'stu nālīkanibhānanāyai namo'stu dugdhodadhijanmabhūtyai | namo'stu somāmṛtasodarāyai namo'stu nārāyaṇavallabhāyai || 12 ||
नमोऽस्तु हेमाम्बुजपीठिकायै नमोऽस्तु भूमण्डलनायिकायै । नमोऽस्तु देवादिदयापरायै नमोऽस्तु शार्ङ्गायुधवल्लभायै ॥ १३ ॥
namo'stu hemāmbujapīṭhikāyai namo'stu bhūmaṇḍalanāyikāyai | namo'stu devādidayāparāyai namo'stu śārṅgāyudhavallabhāyai || 13 ||
नमोऽस्तु देव्यै भृगुनन्दनायै नमोऽस्तु विष्णोरुरसि स्थितायै । नमोऽस्तु लक्ष्म्यै कमलालयायै नमोऽस्तु दामोदरवल्लभायै ॥ १४ ॥
namo'stu devyai bhṛgunandanāyai namo'stu viṣṇorurasi sthitāyai | namo'stu lakṣmyai kamalālayāyai namo'stu dāmodaravallabhāyai || 14 ||
नमोऽस्तु कान्त्यै कमलेक्षणायै नमोऽस्तु भूत्यै भुवनप्रसूत्यै । नमोऽस्तु देवादिभिरर्चितायै नमोऽस्तु नन्दात्मजवल्लभायै ॥ १५ ॥
namo'stu kāntyai kamalekṣaṇāyai namo'stu bhūtyai bhuvanaprasūtyai | namo'stu devādibhirarcitāyai namo'stu nandātmajavallabhāyai || 15 ||
सम्पत्कराणि सकलेन्द्रियनन्दनानि साम्राज्यदानविभवानि सरोरुहाक्षि । त्वद्वन्दनानि दुरितोद्धरणोद्यतानि मामेव मातरनिशं कलयन्तु मान्ये ॥ १६ ॥
sampatkarāṇi sakalendriyanandanāni sāmrājyadānavibhavāni saroruhākṣi | tvadvandanāni duritoddharaṇodyatāni māmeva mātaraniśaṃ kalayantu mānye || 16 ||
यत्कटाक्षसमुपासनाविधिः सेवकस्य सकलार्थसम्पदः । सन्तनोति वचनाङ्गमानसैस्– त्वां मुरारिहृदयेश्वरीं भजे ॥ १७ ॥
yatkaṭākṣasamupāsanāvidhiḥ sevakasya sakalārthasampadaḥ | santanoti vacanāṅgamānasais– tvāṃ murārihṛdayeśvarīṃ bhaje || 17 ||
सरसिजनिलये सरोजहस्ते धवलतमांशुकगन्धमाल्यशोभे । भगवति हरिवल्लभे मनोज्ञे त्रिभुवनभूतिकरि प्रसीद मह्यम् ॥ १८ ॥
sarasijanilaye sarojahaste dhavalatamāṃśukagandhamālyaśobhe | bhagavati harivallabhe manojñe tribhuvanabhūtikari prasīda mahyam || 18 ||
दिग्घस्तिभिः कनककुम्भमुखावसृष्ट– स्वर्वाहिनीविमलचारुजलप्लुताङ्गीम् । प्रातर्नमामि जगतां जननीमशेष– लोकाधिनाथगृहिणीममृताब्धिपुत्रीम् ॥ १९ ॥
digghastibhiḥ kanakakumbhamukhāvasṛṣṭa– svarvāhinīvimalacārujalaplutāṅgīm | prātarnamāmi jagatāṃ jananīmaśeṣa– lokādhināthagṛhiṇīmamṛtābdhiputrīm || 19 ||
कमले कमलाक्षवल्लभे त्वं करुणापूरतरङ्गितैरपाङ्गैः । अवलोकय मामकिञ्चनानां प्रथमं पात्रमकृत्रिमं दयायाः ॥ २० ॥
kamale kamalākṣavallabhe tvaṃ karuṇāpūrataraṅgitairapāṅgaiḥ | avalokaya māmakiñcanānāṃ prathamaṃ pātramakṛtrimaṃ dayāyāḥ || 20 ||
Part 2 · blocks 21–23
देवि प्रसीद जगदीश्वरि लोकमातः कल्याणगात्रि कमलेक्षणजीवनाथे । दारिद्र्यभीतिहृदयं शरणागतं माम्– आलोकय प्रतिदिनं सदयैरपाङ्गैः ॥ २१ ॥
devi prasīda jagadīśvari lokamātaḥ kalyāṇagātri kamalekṣaṇajīvanāthe | dāridryabhītihṛdayaṃ śaraṇāgataṃ mām– ālokaya pratidinaṃ sadayairapāṅgaiḥ || 21 ||
स्तुवन्ति ये स्तुतिभिरमूभिरन्वहं त्रयीमयीं त्रिभुवनमातरं रमाम् । गुणाधिका गुरुतरभाग्यभागिनो भवन्ति ते भुवि बुधभाविताशयाः ॥ २२ ॥
stuvanti ye stutibhiramūbhiranvahaṃ trayīmayīṃ tribhuvanamātaraṃ ramām | guṇādhikā gurutarabhāgyabhāgino bhavanti te bhuvi budhabhāvitāśayāḥ || 22 ||
॥ इति श्रीमच्छङ्कराचार्यकृतं श्रीकनकधारास्तोत्रं सम्पूर्णम् ॥
|| iti śrīmacchaṅkarācāryakṛtaṃ śrīkanakadhārāstotraṃ sampūrṇam ||