श्रीमदाद्य-शंकराचार्य-विरचित-नर्मदाष्टकम् | सबिन्दुसिन्धुसुस्खलत्तरङ्गभङ्गरञ्जितं द्विषत्सुपापजातजातकारिवारिसंयुतम्। कृतान्तदूतकालभूतभीतिहारिवर्मदे त्वदीयपादपङ्कजं नमामि देवि नर्मदे॥१॥
śrīmadādya-śaṃkarācārya-viracita-narmadāṣṭakam | sabindusindhususkhalattaraṅgabhaṅgarañjitaṃ dviṣatsupāpajātajātakārivārisaṃyutam| kṛtāntadūtakālabhūtabhītihārivarmade tvadīyapādapaṅkajaṃ namāmi devi narmade||1||
त्वदम्बुलीनदीनमीनदिव्यसम्प्रदायकं कलौमलौघभारहारिसर्वतीर्थनायकम्। सुमच्छकच्छनक्रचक्रचक्रवाकशर्मदे त्वदीयपादपङ्कजं नमामि देवि नर्मदे॥२॥
tvadambulīnadīnamīnadivyasampradāyakaṃ kalaumalaughabhārahārisarvatīrthanāyakam| sumacchakacchanakracakracakravākaśarmade tvadīyapādapaṅkajaṃ namāmi devi narmade||2||
महागभीरनीरपूरपापधूतभूतलं नमत्समस्तपातकारिदारितापदाचलम्। जगल्लये महाभये मृकण्डुसूनुहर्म्यदे त्वदीयपादपङ्कजं नमामि देवि नर्मदे॥३॥
mahāgabhīranīrapūrapāpadhūtabhūtalaṃ namatsamastapātakāridāritāpadācalam| jagallaye mahābhaye mṛkaṇḍusūnuharmyade tvadīyapādapaṅkajaṃ namāmi devi narmade||3||
गतं तदैव मे भयं त्वदम्बु वीक्षितं यदा मृकण्डुसूनुशौनकासुरारिसेविसर्वदा। पुनर्भवाब्धिजन्मजं भवाब्धिदुःखवर्मदे त्वदीयपादपङ्कजं नमामि देवि नर्मदे॥४॥
gataṃ tadaiva me bhayaṃ tvadambu vīkṣitaṃ yadā mṛkaṇḍusūnuśaunakāsurārisevisarvadā| punarbhavābdhijanmajaṃ bhavābdhiduḥkhavarmade tvadīyapādapaṅkajaṃ namāmi devi narmade||4||
अलक्षलक्षकिन्नरामरासुरादिपूजितं सुलक्षनीरतीरधीरपक्षिलक्षकूजितम्। वसिष्ठशिष्टपिप्पलादकर्दमादिशर्मदे त्वदीयपादपङ्कजं नमामि देवि नर्मदे॥५॥
alakṣalakṣakinnarāmarāsurādipūjitaṃ sulakṣanīratīradhīrapakṣilakṣakūjitam| vasiṣṭhaśiṣṭapippalādakardamādiśarmade tvadīyapādapaṅkajaṃ namāmi devi narmade||5||
सनत्कुमारनाचिकेतकश्यपात्रिषट्पदैः धृतं स्वकीयमानसेषु नारदादिषट्पदैः। रवीन्दुरन्तिदेवदेवराजकर्मशर्मदे त्वदीयपादपङ्कजं नमामि देवि नर्मदे॥६॥
sanatkumāranāciketakaśyapātriṣaṭpadaiḥ dhṛtaṃ svakīyamānaseṣu nāradādiṣaṭpadaiḥ| ravīndurantidevadevarājakarmaśarmade tvadīyapādapaṅkajaṃ namāmi devi narmade||6||
अलक्षलक्षलक्षपापलक्षसारसायुधं ततस्तु जीवजन्तुतन्तु भुक्तिमुक्तिदायकम्। विरिञ्चिविष्णुशंकरस्वकीयधामवर्मदे त्वदीयपादपङ्कजं नमामि देवि नर्मदे॥७॥
alakṣalakṣalakṣapāpalakṣasārasāyudhaṃ tatastu jīvajantutantu bhuktimuktidāyakam| viriñciviṣṇuśaṃkarasvakīyadhāmavarmade tvadīyapādapaṅkajaṃ namāmi devi narmade||7||
अहोऽमृतं स्वनं श्रुतं महेशकेशजातटे किरातसूतवाडबेषु पण्डिते शठे नटे। दुरन्तपापतापहारिसर्वजन्तुशर्मदे त्वदीयपादपङ्कजं नमामि देवि नर्मदे॥८॥
aho'mṛtaṃ svanaṃ śrutaṃ maheśakeśajātaṭe kirātasūtavāḍabeṣu paṇḍite śaṭhe naṭe| durantapāpatāpahārisarvajantuśarmade tvadīyapādapaṅkajaṃ namāmi devi narmade||8||
इदं तु नर्मदाष्टकं त्रिकालमेव ये सदा पठन्ति ते निरन्तरं न यान्ति दुर्गतिं कदा। सुलभ्यदेहदुर्लभं महेशधामगौरवं पुनर्भवा नरा न वै विलोकयन्ति रौरवम्॥९॥
idaṃ tu narmadāṣṭakaṃ trikālameva ye sadā paṭhanti te nirantaraṃ na yānti durgatiṃ kadā| sulabhyadehadurlabhaṃ maheśadhāmagauravaṃ punarbhavā narā na vai vilokayanti rauravam||9||
इति श्रीमद् आद्यशंकराचार्यविरचितं नर्मदाष्टकं सम्पूर्णम् |नर्मदे हर | नर्मदे हर | नर्मदे हर ||
iti śrīmad ādyaśaṃkarācāryaviracitaṃ narmadāṣṭakaṃ sampūrṇam |narmade hara | narmade hara | narmade hara ||