महायोगपीठे तटे भीमरथ्या वरं पुण्डरीकाय दातुं मुनीन्द्रैः । समागत्य तिष्ठन्तमानन्दकन्दं परब्रह्मलिङ्गं भजे पाण्डुरङ्गम् ॥ १ ॥
mahāyogapīṭhe taṭe bhīmarathyā varaṃ puṇḍarīkāya dātuṃ munīndraiḥ | samāgatya tiṣṭhantamānandakandaṃ parabrahmaliṅgaṃ bhaje pāṇḍuraṅgam || 1 ||
तडिद्वाससं नीलमेघावभासं रमामन्दिरं सुन्दरं चित्प्रकाशम् । वरं त्विष्टकायां समन्यस्तपादं परब्रह्मलिङ्गं भजे पाण्डुरङ्गम् ॥ २ ॥
taḍidvāsasaṃ nīlameghāvabhāsaṃ ramāmandiraṃ sundaraṃ citprakāśam | varaṃ tviṣṭakāyāṃ samanyastapādaṃ parabrahmaliṅgaṃ bhaje pāṇḍuraṅgam || 2 ||
प्रमाणं भवाब्धेरिदं मामकानां नितम्बः कराभ्यां धृतो येन तस्मात् । विधातुर्वसत्यै धृतो नाभिकोशः परब्रह्मलिङ्गं भजे पाण्डुरङ्गम् ॥ ३ ॥
pramāṇaṃ bhavābdheridaṃ māmakānāṃ nitambaḥ karābhyāṃ dhṛto yena tasmāt | vidhāturvasatyai dhṛto nābhikośaḥ parabrahmaliṅgaṃ bhaje pāṇḍuraṅgam || 3 ||
स्फुरत्कौस्तुभालंकृतं कण्ठदेशे श्रिया जुष्टकेयूरकं श्रीनिवासम् । शिवं शन्तमीड्यं वरं लोकपालं परब्रह्मलिङ्गं भजे पाण्डुरङ्गम् ॥ ४ ॥
sphuratkaustubhālaṃkṛtaṃ kaṇṭhadeśe śriyā juṣṭakeyūrakaṃ śrīnivāsam | śivaṃ śantamīḍyaṃ varaṃ lokapālaṃ parabrahmaliṅgaṃ bhaje pāṇḍuraṅgam || 4 ||
शरच्चन्द्रबिम्बाननं चारुहासं लसत्कुण्डलाक्रान्तगण्डस्थलान्तम् । जपारागबिम्बाधरं कञ्जनेत्रं परब्रह्मलिङ्गं भजे पाण्डुरङ्गम् ॥ ५ ॥
śaraccandrabimbānanaṃ cāruhāsaṃ lasatkuṇḍalākrāntagaṇḍasthalāntam | japārāgabimbādharaṃ kañjanetraṃ parabrahmaliṅgaṃ bhaje pāṇḍuraṅgam || 5 ||
किरीटोज्ज्वलत्सर्वदिक्प्रान्तभागं सुरैरर्चितं दिव्यरत्नैरनर्घैः । त्रिभङ्गाकृतिं बर्हमाल्यावतंसं परब्रह्मलिङ्गं भजे पाण्डुरङ्गम् ॥ ६ ॥
kirīṭojjvalatsarvadikprāntabhāgaṃ surairarcitaṃ divyaratnairanarghaiḥ | tribhaṅgākṛtiṃ barhamālyāvataṃsaṃ parabrahmaliṅgaṃ bhaje pāṇḍuraṅgam || 6 ||
विभुं वेणुनादं चरन्तं दुरन्तं स्वयं लीलया गोपवेषं दधानम् । गवां वृन्दकानन्ददं चारुहासं परब्रह्मलिङ्गं भजे पाण्डुरङ्गम् ॥ ७ ॥
vibhuṃ veṇunādaṃ carantaṃ durantaṃ svayaṃ līlayā gopaveṣaṃ dadhānam | gavāṃ vṛndakānandadaṃ cāruhāsaṃ parabrahmaliṅgaṃ bhaje pāṇḍuraṅgam || 7 ||
अजं रुक्मिणीप्राणसंजीवनं तं परं धाम कैवल्यमेकं तुरीयम् । प्रसन्नं प्रपन्नार्तिहं देवदेवं परब्रह्मलिङ्गं भजे पाण्डुरङ्गम् ॥ ८ ॥
ajaṃ rukmiṇīprāṇasaṃjīvanaṃ taṃ paraṃ dhāma kaivalyamekaṃ turīyam | prasannaṃ prapannārtihaṃ devadevaṃ parabrahmaliṅgaṃ bhaje pāṇḍuraṅgam || 8 ||
स्तवं पाण्डुरङ्गस्य वै पुण्यदं ये पठन्त्येकचित्तेन भक्त्या च नित्यम् । भवाम्भोनिधिं तेऽपि तीर्त्वान्तकाले हरेरालयं शाश्वतं प्राप्नुवन्ति ॥ ९ ॥
stavaṃ pāṇḍuraṅgasya vai puṇyadaṃ ye paṭhantyekacittena bhaktyā ca nityam | bhavāmbhonidhiṃ te'pi tīrtvāntakāle harerālayaṃ śāśvataṃ prāpnuvanti || 9 ||
इति श्रीमत्परमहंसपरिव्राजकाचार्यस्य श्रीगोविन्दभगवत्पूज्यपादशिष्यस्य श्रामच्छंकरभगवतः कृतौ पाण्डुरङ्गाष्टकं सम्पूर्णम् ॥
iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrāmacchaṃkarabhagavataḥ kṛtau pāṇḍuraṅgāṣṭakaṃ sampūrṇam ||